Sindh Governor Imran Ismail 14

گورنرسندھ عمران اسماعیل کی پیر صاحب پگارا کے ظہرانہ میں شرکت

گورنرسندھ عمران اسماعیل نے وفاقی وزیر برائے منصوبہ بندی و ترقیات اسد عمر، وفاقی وزیر برائے نجکاری محمد میاں سومرو، رکن سندھ اسمبلی حلیم عادل شیخ اور دیگر کے ہمراہ گرینڈ ڈیمو کریٹک الائنس کے رہنما پیر صبغت اللہ شاہ راشدی کے گھر ظہرانہ میں شرکت کی ۔ گورنرسندھ نے پیر صبغت اللہ شاہ راشدی سے ان کی والدہ کی خیریت بھی دریافت کی ۔بعد ازاں میڈیا سے گفتگو میں گورنرسندھ نے کہا کہ میں یہاں کسی کو منانے کے لئے نہیں آیا کیوں کہ یہ گھر کبھی روٹھا ہی نہیں تو مناﺅں گا کسے ، یہ گھر بھی میرا اپنا ہے یہاں مجھے بے حد پیار ، محبت اور شفقت حاصل ہوتی ہے پیر صاحب میرے بڑے ہیں انہوں نے ہمیشہ مجھے پیار دیا اور اگر پیر صاحب ڈانٹ بھی دیں تو بھی مجھے ان سے کوئی گلہ نہیں ہوگا پیر صاحب نے ہمیشہ محبت سے میری رہنمائی فرمائی ۔ انہوں نے مزید کہا کہ میری کوشش ہوتی ہے کہ پیر صاحب سے سندھ کے معاملات پر رہنمائی حاصل کروں، ان کے تجربہ سے بہت فائدہ ہوتا ہے ان سے مشاورت سے صوبہ کے کئی مسائل حل کرنے میں مدد ملتی ہے ، آج کی ملاقات میں وفاق کے تحت صوبہ میں جاری ترقیاتی منصوبوں میں پیش رفت اور مستقبل کے دیگر امور پر سیر حاصل گفتگو ہوئی ہے ۔انہوں نے کہا کہ صوبہ کے لئے مزید مشاورت کے لئے یہاں آئے ہیں چونکہ اسد عمر کا تعلق بھی اسی صوبہ سے ہے اس لئے اسد عمربھی پیر صاحب سے صوبہ کی ترقی کے ضمن میں رہنمائی حاصل کرنے کے لئے آئے ہیں۔ ایک سوال کے جواب میں گورنرسندھ نے کہا کہ سندھ میں سیاسی تبدیلی پرکوئی بات نہیں ہوئی لیکن فلاحی تبدیلی کی بات ہوئی ہے جس طرح پورے پاکستان میں فلاحی تبدیلی آرہی ہے اسی طرح سندھ میں بھی فلاحی تبدیلی آنی چاہئے ۔

اس خبر پر اپنی رائے کا اظہار کریں