پشاور:

بچوں کو معذوری کی بیماری سے بچانے کے لیے خیبرپختونخوا کے 28 اضلاع میں انسداد پولیو مہم کا آغاز کر دیا گیا ہے۔

سیکرٹری صحت عامر ترین سلطان نے مہم کا افتتاح کیا۔ اس موقع پر میڈیا سے گفتگو کرتے ہوئے سیکرٹری صحت نے کہا کہ پولیو کے خاتمے کے حوالے سے یہ انتہائی اہم دن ہے۔

پانچ روزہ مہم صوبے کے 28 اضلاع میں چلائی جا رہی ہے۔ صوبے کے 17 اضلاع میں مکمل اور 11 اضلاع میں جزوی مہم چلائی جائے گی۔

مہم کے دوران 5 سال سے کم عمر کے 4.4 ملین بچوں کو پولیو سے بچاؤ کے قطرے پلائے جائیں گے۔

سلطان نے بتایا کہ مہم کے لیے 15 ہزار 212 ٹیمیں تشکیل دی گئی ہیں۔ انہوں نے کہا کہ پولیو ورکرز کی سیکیورٹی کے لیے 25 ہزار سے زائد سیکیورٹی اہلکار تعینات کیے گئے ہیں۔

ان کا مزید کہنا تھا کہ مہم کے دوران لکی مروت، ٹانک، ڈی آئی خان اور جنوبی وزیرستان پر خصوصی توجہ دی گئی۔

انہوں نے مزید کہا کہ اب انتظامیہ پولیو کے قطرے پلانے سے انکار کرنے والے والدین کو پکڑنے کی بجائے دوسرے طریقوں سے راضی کرنے کی کوشش کر رہی ہے۔

ایک سوال کے جواب میں سیکرٹری صحت نے کہا کہ پشاور میں پولیو وائرس زیادہ پایا جاتا ہے تاہم امدادی اداروں کے تعاون سے کی جانے والی کوششوں کے باعث اس بار سیوریج کے نمونوں کو وائرس سے پاک قرار دیا گیا ہے۔

رواں سال صوبے میں پولیو کے 20 کیسز رپورٹ ہوئے ہیں۔ ان میں سے 17 پولیو کیسز شمالی وزیرستان، 2 لکی مروت اور ایک جنوبی وزیرستان سے سامنے آیا ہے۔

سلطان نے کہا کہ بدقسمتی سے صوبے میں منفی پروپیگنڈے کی وجہ سے پولیو وائرس کا خاتمہ نہیں ہو رہا۔

انہوں نے مزید کہا کہ اس منفی پروپیگنڈے اور افواہوں کی وجہ سے والدین بھی غلطیوں کا شکار ہو جاتے ہیں اور بچوں کو پولیو کے قطرے نہیں پلاتے جس کے لیے اب مزید کام کیا جا رہا ہے۔